اليوم بدأ العمل بقانون السير الجديد في سوريا
وانا ما بعرف شو اللي صاير بالبلد اليوم
الشوارع فيني قول انو فاضيه وشوفيرية التكاسي اغلبهم مو عاجبهم الوضع الجديد
ودوريات الشرطه مستنفره والحاله تعبااااانه
ووصلتني الاوامر اليوم من السلطات العليا (بابا) انو انزع اللزقات عن السياره وضليت شي ساعتين واقف تحت الشمس لحتى خلصت
خلاصة الامر انو القانون الجديد ما اختلف كتير عن القديم بس الاختلاف صار بالتشديد على المخالفات ومضاعفة الغرامات شي خمس اضعاف وببعض المخالفات صار فيها توقيف وحبس وحذف نقط من الشهاده
والله يسترنا من غضب الشرطه
fatosha قال
ويسترنا من طمع الشرطة!!!!
لا تنسى كمان تشتري المثلث والطفاية وشنتاية الإسعافات الأولية
Alloush قال
لك يا زلمة قال المشاة إذا قطعوا الطريق من غير المكان المخصص عليها غرامة 200 ألف ليرة !!!.
إيه وليييييييييييي. ما أنت بتعرفني بنطوط نطوطة بالشارع من رصيف لرصيف، بدنا شهادة مشاة على الحالة، تخيّل يوقفني الشرطي ويقلي غرامة 200 ألف ليرة !!!. إيه والله ببطل أطلع من البيت لو السما زرقا.
شو 200 ألف ليرة، خلوها يا أخي غرامة 200 ليرة، أسهل، على الأقل هيك ما بيصير رشاوي، مو محرزة يصير فيها رشوة، وكمان لو حطو عقوبة أداء خدمات اجتماعية كانت أحسن من هيك غرامة معروف أصلاً إنو رح تنتهي برشوة.
Alloush قال
بعد التمحيص بسيريا نيوز تبينلي إنو الغرامة 200 ليرة وليس 200 ألف، هذا البرغش أكلّي عيوني، من كتر ما عم أدرس محاسبة صرت أي رقم شوفو أتوماتيك بضفلو ألف من عندي.
عماد قال
fatosha
بالنسبه لطمع الشرطه هاد شي طبيعي يعني فيكي تقولي انو رح يرفعوا التسعيرة شوي
يعني حالة تناسب طردي مع نوع المخالفه
alloush
شو عم يصير معك يا زلمه بعدين شو الفرق بين ال200 وال200 الف
يعني من طرف الجيبه الواحد بيدفع الغرامه وبيخلص
الله يوفقك بالمحاسبه ويوفقني بموادي
الله يعينا
FaRah قال
ايه والله الله يستر …
يعني ازا قطعت الشارع وطلع علي مخالفة … وما كان معي 200 ليرة شو بصيرلي سجل ودفتر عند الشرطة مثلاً ؟؟؟؟؟
بعدين يعني ما بتزبط ابداً السوارع اللي فيها مكان مخصص للمشاة .. فينا نقول معدودة !!؟؟!؟
fatosha قال
فرح .. بيشلحوكي الكندرة ..
max13 قال
شو بدنا انا متفاجأ يا جماعة بها الشوفيرية الي صاروا بين ليلة وضحاها أوادم وبيتقيدوا بالنظام على كل الشهر هاد لسا مخصص نجريبي يعني بيكتفوا فيه بالتنبيه وبعدين الله يستر
عماد قال
فرح
على قوله فتوشه بيشلحوكي الكندره (او الموبايل)او بتنامي ببيت خالتك لوقت ما يجي الدعم
max13
والله مزبوط احلى شي انو الشوفيريه صاروا اوادم ومنيحين وما في متلهم
مشكور عالمرور
أحمد نذير بكداش قال
منيح لا بعرف قود ولا عندي سيارة
وائل ح قال
قانون جيد بس ياريت يطبق على الكل
Emad قال
احمد بكداش
الله يرزقك وتشتري سياره وتركبني جنبك وبعلمك تسوق ولا يهمك
وائل ح
اكيد ما رح يطبق عالكل